Assessorato della Cultura Apertura Scuola di Lingua Sarda 1999 - 2000

Comunu de Cuartu Sant'Aleni Assessorau de sa Cultura e de sa Limba Sarda

Palàtziu Comunali bia de Iliju Porcu 09045 - Cuartu Sant'Aleni (provincia de Casteddu)

Ofitziu po sa Limba Sarda

BANDU PO S'IMPRENTA

Su Comunu de Cuartu Sant'Aleni, Assessorau a sa Limba Sarda, fait sciri ca Lunis su 2 de su Mes''e Ladamini de su 2000, torrat a oberri sa Domu de sa Limba e de sa Cultura Sarda.

Sa seu at a essiri sa Domu de is de Olla, in s'arruga de Iligiu Porcu, in Cuartu Sant'Aleni.

Sa Domu at a essiri oberta a merii, cun atobius aundi s'at a pòdiri fueddai e arrexonai a suba de dognia tema de importu po sa lingua e sa cultura nosta.

Nci ant a essiri puru letzionis de gramatica, sintassi, iscridura e ligidura de su sardu; arrexonamentus a suba de sa literadura, de sa poesia, de sa musica, de su ballu, de su connottu e de sa storia sarda; in prus s'at a arrexonai de s'umperu de su sardu in sa vida pubrica e moderna: in sa Scola, in s'Universidadi, in is arrelatas cun is istitutzionis (Regioni, Provincias, Comunus), in is giornalis, in sa radio e in sa telebisioni e in Sa Retza.

Sa Domu po sa Limba Sarda bolit essiri duncas, prus chi un'Iscola, (chi no est faina de cumpetentzia de unu comunu ma de su Stadu e de sa Regioni) unu situ innui sa genti potzat intendiri e umperai su sardu po fueddai, iscriri e s'arrelatai cun is atrus.

Cust'est istettia sempri sa tenta de s'Assessorau a sa Cultura ghiau de Aleni Ledda. Defattu, giai de s'inghitzu de s'incarrigu at donau impellida po s'afortiamentu e s'abalentamentu de su Sardu.

Giai in su 1999, a pustis de sa bessida de sa Lei de sa Regioni n. 26 chi arreconesciat sa propiu dinnitadi a su sardu e a s'italianu, s'Assessorau iat apariciau, cun sa fiantza de sa Comunidadi Europea, po su prim'annu sa Domu de sa Limba Sarda.

Cussa faina iat tentu s'acordiu de totus is scientis (400) chi iant potziu abitai is cursus e chi iant pediu de sighiri po is annus a bènniri.

Sa bessida de sa Lei de su Stadu, sa n. 482 de su 1999, a suba de su bilinguismu po totus is limbas de minoria chistionadas in Italia, a donau fortza a sa pulitiga culturali de su comun''e Cuartu chi, po boluntadi de su Sindigu Gratzianu Milia, a fatu nasci un Assessorau nou, mai biu in Sardigna (e duncas in su mundu): s'Assessorau a sa Limba Sarda, tzerriendu torra Aleni Ledda a du ghiai, cun s'agiudu de su dott. Peppi Corongiu incarrigau de sighiri e apariciai s'Ofitziu po sa Limba Sarda.

A pustis de ai dispìdiu sa primu Detzididura in sardu chi tenit su propiu balimentu po is leis de su Stadu Italianu, s'Assessorau aparicciat in su Martzu 2000, po su segund'annu, sa Domu de sa Limba Sarda chi, a pustis de is bagantzas at a sighiri is atobius fintzas a Mes''e Idas.

Data de Imprenta: 2000

Quartu S.Elena Fotografia Portale di Casa Olla

Aberridura de sa scola de limba sarda 1999-2000

Su Comunu de Quartu Sant'Aleni torrat a oberri s'iscola de limba sarda.

S'ant a fai cursus a is noeddus, a chi ant sighiu s'annu passau, a is maistus de scola, e in prus cursus de limba uffizziali a is giornalistas, a is impreaus pubricus, tradusidores e iscridoris.

Po preguntas e iscrizionis, acostai a s'uffizziu de sa curtura e de sa limba sarda (5° P) in sa domu comunali, o telefonai a su 039-070-8601355 de is 11 a sa una de a merii, lassendi nomini, domu, sangunau e telefunu finzas a su 21 de Friaxu.

Is lezionis s'ant a cumenzai su 28 de Friaxu 2000; a s'acabu de su cursu donnia scienti at a arriciri unu paperi de frequenzia.

Torrat a oberri sa Domu de sa Limba e de sa Cultura Sarda. Sa seu at a essiri sa Domu de is de Olla, in s'arruga de Iligiu Porcu, in Cuartu Sant'Aleni.

Data de Imprenta: Mesi 'e Cabudanni 1999

Notizie Cultura: Lingua Sarda 1999-2000

Pàzina Agoa Sighit

Dicius Antigus