Comunu de Quartu Sant'Aleni

Provincia de Casteddu

ASSESSORAU DE SA CULTURA E LIMBA SARDA

ITA AT FATU, ITA EST FAENDI, ITA AT A FAI

Su comunu de Quartu Sant'Aleni no tenit nudda de ispetziali. Est che is aturus comunus de Sardinnia. Su chi est de importu est feti ca du at sa possibilidadi in custus annus de fai una sperimenta noa in sa pulitica a suba de sa limba in d'una tzidadi de 70 mila biventis in is treminis de Casteddu. Unu logu inui su sardu s'agatàt in trumentus, ma po cussu etotu podit bogai fortzas mai provadas. Quartu est una tzitadi noa, giovuna, inui du at una traditzioni antiga de bidda sarda chi ses mantennia in custus tempus puru. Su comumu est boghendi a campu unu disinnu bonu pratzìu in duas partis: sa primu, tutorai is traditzionis de sa tzitadi, sa segunda annovai sa limba. Su fundamentu de custa pulitica est istau de cuncordai una mòvida de curtura po scidai da vida de sa tzittadi. Inghitzendi de is formas de sa tradizioni puru: is lollas, is domus campidanesas, is spassius a intru de is pratzas. Totu custu po fai a cumprendi ca s'antigoriu e sa modernidadi podint bivi impari e donai frutus bellus. No est possibili contai spetaculus e atobius de curtura chi in custus annus ant cambiau sa faci de tzidadi. Quartu parìat unu logu po furriai a dromiri feti, e invecis imoi est unu logu inui est praxili a biviri.

Aici s'est sighìu cun s'agiudu de sa ley 26 a afortiai is traditzionis comenti sa poesia de is cantadoris chi praxit meda a is quartesus e benit a essiri unu bacili seguru de sa lingua e de sa curtura. Is cursus dus ant sighiu meda pipius e giovunus chi funt apassionaus de custa moda poetica chi in is campidanus e in su Sulcis tenet pariccius ammiradores. S'est alobada a su cursu de Antoni Pani su maistu quartesu de cust'arti, sa scola de Literadura e de poesìa de su professori Giuanni Perrìa, chi at scritu librus meda in pitzu de custu argumentu.

Ma su momentu prus bellu de custa faina est istau candu s'est potzidu isperimentai sa limba comemti unu mediu nou in is cursus cuncordaus impari cun s'Arci e cun s'agiudu e sa fiantza de S'Unioni euroepa cun s'Atzioni po is limba de minorìa de sa Dirigidura Generali n° 12. Eus tentu 350 scritus chi si funt totus dipromaus in d'unu atobiu mannu fatu in is domus de Olla in Quartu su 12 de su mesi de treulas de su 1999.

Imoi una de is mungias prus fortis est cussa de battiri sa limba sarda in s'aministradura pubrica, in is ufitzius de is comunus e in sa Regioni. In su Comunu de Quartu Sant'Aleni eus moviu is primus passus faendi paperis scrutis in ocasionis dispostas. Iat a rrechedi de fai unu sfrozu nou po produsiri paperis in sardu no non podet fuiri s'idea de comenti si fait a uffiziali su sardu ufitziali bali de prus.

Sa lingua sarda iat a bolli imperada in sa comunicatzioni, in is bandus ghetaus an sa tzidadi. Custu at a fai s'assessorau a sa lingua sarda e at a intzitziligai sa Regioni po fai una pulitica seria.

ARRESUMU - Su comunu de Quartu Sant'Aleni est in mungia po

• Difendiri su connottu de sa zittadi;
• Tutorai sa lingua sarda po comenti est subrabivia;
• Affortiai s'ispainamentu de sa lingua;
• Annovai s'impreu de sa lingua in is offizzius e in is iscolas;
• Isperimentai su sardu in zittadi, in sa vida moderna;
• Aprontai su tempus bennidori de sa zittadi cun d'unu disinnu de progressu cun medas linguas e curturas;
• Arrelatai cun Universidadi, Regioni e Stadu po binciri in sa chistioni de sa lingua;
• Ponni in fainas is leys 26/97 e 482/99.

G.Corongiu - Lingua Sarda - Ligau Detzididura n. 121 de su 27-03-2000

Dicius Antigus