Comunu de Quartu Sant'Aleni

Provincia de Casteddu

ASSESSORAU DE SA CULTURA E LIMBA SARDA

S'ASSESSORA

A sa cumpraxentzia de sa Primu Boxi de su Parlamentu Sardu On. Efis Serrenti

CHISTIONI: Difentza de is limbas de minoria - Faìnas po cunfrommai sa Lei de sa Regioni n. 26 de 1997 cun sa lei de su Stadu n° 482 de su 1999.

Vissignoria,

sendu passau giai un'annu de candu su Parlamentu Italianu at dispidiu sa lei n° 482 de su 1999 po sa defentza de is limbas istoricas de minorias, iaus a bolli presentai a sa cumprexentzia de Vissignoria unas cantus preguntas in argumentu de su chi iat a podi fai su Parlamentu Sardu po amelorai sa situatzioni inoi in Sardigna. Comenti Vissignoria scit beni, nosu sardus eus fattu sa lei regionali po difendi e avalorai sa limba nostra primu chi su Stadu iat a essi bogau sa lei sua chi si movit imoi comenti una "legge-quadro". Si puru sa 482 no est sa lei prus bella e prus avantzada de su mundu po agiudai is limbas pitticas, at de calencuna manera postu a in antis possibilidadis e imbentus nous chi iant a podi essi utilis po sa batalla de su sardu. A nosu perou parit chi, foras de calencunu e de Vissignoria, is ominis sardus chi iant depi fai is leis no si ndi siant acattaus de sa netzessidadi de poni manu po cunfrommai sa lei chi teneus cun is avantzamentus e progressus de cussa italiana. Po custu eus detzidiu de istrobai a Vissignoria e de preguntai is cosas chi sighint:

1. no iat a podi Vissignoria, cun sa calidadi de Primu Boxi de su Parlamentu Sardu, donai intzidu a sa Commissioni competenti e a su Cunsillu de cumentzai a biri is propostas po cunfrommai sa lei regionali cun cussa de su Stadu chi est prus avantzada?

2. no iat a podi Vissignoria pigai e ghettai una proposta noa po sa Carta de Autonomia (Statuto Speciale) a manera de ponni sa defentza de sa lingua sarda in is printzipius fundativus de sa Regioni aici comenti ant fattu in su Trentinu po is minorias ladinas, cimbras e mochenas? Ddi preguntaus custu poita bideus chi si chistionat meda de federalismu e de populu sardu s'umprus de is bortas scarescendusindi chi sa limba est su sinnu prus marcau de s'identidadi sarda.

3. no iat a podi Vissignoria pigai e cunvinci su Consillu Sardu a votai una motzioni de imbiai a su Parlamentu Italianu po ponni in sa Costituzioni su nomini in duas limbas de s'isula nosta (Sardegna-Sardigna) aici comenti ant fattu sa Valle d'Aosta - Vallèè D'Aoste e s'Alto Adige- Sud Tirol?

4. no iat a podi Vissignoria cumentzai a aparicciai in is ufitzius de su Consillu po tradusiri tottu is leis e tottus is paperis in sardu donendu aici unu grandu agiudu po s'amodernamentu de sa lingua nosta ca ndi tenit a bisongiu?

In s'abettu de is novas prus bonas de Vissignoria, saludus de coru

Quartu Sant'Aleni, 8 de Dognassantu 2000

Aleni Ledda

Assessori po Sa Lingua Sarda

Comunu de Quartu Sant'Aleni

Lingua Sarda Notizie: medesimo articolo in lingua italiana

Dicius Antigus