Limbasarda - Sotziu pro s'identidade

Data: 2000-11-28

CARTA DE SU SOTZIU

REGULAS DE INTRO - SOS PRINTZIPIOS

LIMBASARDA est unu Sotziu de pessones chi cherent traballare pro s'amparu e s'afortigamentu de s'identidade e de sa natzionalidade sarda.

Sa prima cumbata est pro sa limba chi est sinnu distintu de s'identidade natzionalitaria sarda.

Sos printzipios fundativos de LIMBASARDA sunt collidos a banda in su “Disinnu” chi est su Manifestu de sas fainas de su Sotziu. Chie cheret intrare in LIMBASARDA depet rispetare sa litera e s'ispiritu de su Disinnu fatu dae sos sotzios fundadores.

Sa fara de su sotziu est sa pandela de Sardinna gasi comente si connoschet cun in prus sa frima de su Sotziu. Donzi sotziu s'impinnat a nde tenner una in domo.

Sa sea de LIMBASARDA est posta pro como in domo de su segretariu, carrera de Cornalias n.35 - 09121 Casteddu.

LIMBASARDA est unu Sotziu chi no at iscopu de balanzare dinare e sa zente chi lu fromat no at e no mustrat interessu perunu in sos incarrigos chi pigat e in sas cosas chi faghet.

Su traballu, sos incarrigos, sos iscritos chi si faghent pro su Sotziu no ant a esser pagados, ma cada faina at a esser fata chene pedire dinare e pro ispiritu de serbitziu e sucurru pro sos ateros.

Su Sotziu LIMBASARDA est formadu de pessones chi cherent allegare, amparare, afortigare, mantenner pro su tempus benidore sa limba natzionalitaria de Sardinna. Pro custu s'unicu limbazu chi si podet impitare in sos atobios de su Sotziu est su sardu in totu sas calidades chi lu distinghent.

In sos atobios de su Sotziu podent impitare s'italianu o ateras limbas sos terramannesos o ateros istranzos chi ant preguntadu permissu a sos cumponentes de su Sotziu matessi. Sos sardos depent faeddare sa limba natzionalitaria de Sardinna pro testimonìa e coerentzia.

S'impreu de s'italianu o de ateras limbas istranzas est amitidu in sos atobios publicos e in sas relatas sotziales petzi cando bi deghet, ma semper pro lomper su matessi a sos resurtados chi si cherent pissighire.

SOS SOTZIOS

Sos cumponentes de LIMBASARDA si mutint sotzios e sunt partzidos segundu sa natura de sos azudos chi dant e cunfroma a comente si ponent cun su sotziu in:

• sotzios fundativos
• sotzios de animu
• sotzios amparadores
• sotzios de onore

Sos sotzios fundativos sunt cussos chi ant fromadu su Sotziu e l'ant dadu sos primos fundamentos politicos e culturales. Issos ghiant su Sotziu e detzident, cando b'at de lu fagher, sos issèberos prus de importu pro sa bida de LIMBASARDA. Chie intrat in su Cunsizu cun sos modos de s'articulu 20 pigat sos deretos e sos doveres de sotziu fundativu.

Pro s'iscrier comente sotziu amparadore o de animu no bi cheret presentada dae parte de nemos. Cando intrat in su Sotziu sa pessone frimat unu papiru inue decrarat de atzetare su programa, sas ideas e su sentidu de LIMBASARDA. Isse s'impinnat de no chircare de mudare mai custu sentidu.

Su Cunsizu de sos sotzios fundadores aprovat sas preguntas de intrada in LIMBASARDA de sos sotzios amparadores e de sos sotzios de animu. Ambos duos depent ponner unu tantu in dinare pro s'iscrier. Su tantu minimu est istabilidu dae su Cunsizu.

Leat sa calidade de sotziu amparadore chie dat unu tantu in dinare de importu. Su tantu est istabilidu donzi annu dae su Cunsizu.

Sunt sotzios de onore, e sunt numenados cun detzididura adduida dae totu su Cunsizu, cussas pessones chi ant fatu su bene de sa Limba e de s'identidade natzionalitaria sarda.

Donzi sotziu s'impinnat a no fagher dannu cun paraulas, fainas e atziones a su Sotziu e a no ofender sos ateros sotzios.

Chie no rispetat sas regulas chi sunt iscritas inoghe podet esser bogadu cun detzididura pigada dae su Cunsizu cun majoria simple. S'Assemblea no podet bogare a nemos.

SU CUNSIZU E SU GHIADORIU

S'atobiu de sos sotzios fundativos si narat Cunsizu.

Pro intrare in su Cunsizu bi cheret a su nessi sa presentada de tres sotzios fundativos. Sos sotzios detzident de fagher intrare sos ateros cun majoria de duos tertzos (2/3) de sos sotzios fundativos in carriga. Chie intrat in su Cunsizu pigat sos deretos e sos doveres de sotziu fundativu.

Sas detzididuras de su Cunsizu sunt pigadas a majoria simple cun botu a craru, foras chi no si depat fagher carchi cosa chi tratet de pessones. In casos gasi, si calencunu lu pedit, su botu podet esser segretu.

Unu sotziu fundativu no podet esser bogadu dae su Cunsizu si no pro resones graes o si at fatu dannu grae a su Sotziu cun paraulas o atziones.

Si unu sotziu fundativu no benit a sos atobios de su Cunsizu chene mutivu balidu pro un'annu, si cunsiderat bogadu a fora.

Su Cunsizu pro paghe e cuncordia, chircat de impedire sas bogadas finas a s'urtimu arrematu. Si unu sotziu fundativu at cumitidu mancantzias graes podet esser bogadu dae su cunsizu ebia a s'unanimidade. Sa bogada depet esser botada duas bortas a distanzia a su nessi de 15 dies.

Sos sotzios fundativos issèberant in intro de issos sos incarrigados de ghiare su sotziu chi sunt:

• Sa Prima Boghe,
• Su Segundu (o Sa Segunda),
• Su Segretariu (o Sa Segretaria),
• S'Armentariu (o S'Armentaria)

Podent pigare custas carrigas sos sotzios de su Cunsizu ebia.

Sa Prima Boghe rapresentat LIMBASARDA foras dae su sotziu in sa bida publica, in totu sas seas e in totu sas ocasiones ufitziales chi capitant. Isse at prus de totu sos ateros su dovere de bogare a craru sos isseberos, sas criticas, sas ideas, sos disinnos de su Sotziu. At sa possibilidade, si at su mandadu de su Cunsizu, de frimare autos, papiros e documentos cun balimentu de leze.

Su Segundu azudat sa Prima Boghe in sos doveres suos e si che ponet in logu suo cando isse mancat o cando su Cunsizu lu pedit.

Su Segretariu est sa pessone chi cuncordat totu sas fainas de intro de su Sotziu e daet cara chi sas atividades de intro andent in bonu. De acordu cun sa Prima Boghe isse: convocat sos atobios de su Cunsizu, chircat sa sea pro sos atobios de su Cunsizu, proponet sas chistiones de manizare, contivizat sas listas de sos sotzios, contivizat sos papiros ufitziales e de intro de LIMBASARDA.

S'Armentariu guvernat in intro de su Sotziu totu sas chistiones de dinare. Contivizat sa cascia, zustificat balanzos e gastos, faghet su Bilanciu in sas dies istabilidas. Paris cun su Cunsizu e cun totu sos sotzios, chircat azudos de fiantzia pro su Sotziu.

Su Cunsizu de sos sotzios fundativos dat permissu a sa Prima Boghe, Segundu, Armentariu e Segretariu de s'atobiare a sa sola cando b'at de pigare detzididuras urzentes o cando no b'est su tantu pro convocare su Cunsizu matessi. Custu atobiu si mutit Ghiadoriu.

Si unu de sos bator de su Ghiadoriu depet pigare una detzididura de importu, e no b'at tempus de cuncordare un'atobiu, podet intender sos ateros cun su telefono o cun sa Retza.

Su Ghiadoriu de LIMBASARDA relatat a su Consizu de totus sas fainas e detzididuras pigadas.

Candu su Ghiadoriu est in disacordu detzidit a majorìa simple. Sa Prima Boghe at sa possibilidade de botare duas bias.

Su Ghiadoriu durat in carriga cantu disinnat su Cunsizu, dae unu minimu de tres meses a unu massimu de tres annos.

Totu sas detzididuras de importu pigadas dae su Ghiadoriu depent esser adduidas dae su Cunsizu.

Su Cunsizu podet delegare su Ghiadoriu a tratare e detzider sas chistiones disciplinares. Sas detzididuras si pigant a majoria simple pro sotzios amparadores e de anima.

S'ASSEMBLEA

S'Assemblea est cumposta dae totu sos sotzios.

A su nessi una borta a s'annu su Cunsizu conbocat s'Assemblea chi aproat su bilanciu e arrejonat de sas fainas e de sos pensamentos politicos de su Sotziu.

In custa sea sos sotzios podent avansare propostas iscritas a su Cunsizu in argumentu de ideas, disinnos e fainas. Pro calesisiat motzione o proposta iscrita bi cheret, a su nessi, sa frima de su 10 pro chentu de s'Assemblea. Sas propostas de s'Assemblea no podent mudare su Manifestu o sa cumponidura de su Ghiadoriu e de su Cunsizu.

S'Assemblea est ghiada dae sa Prima boghe, dae su Segundu o dae unu cumponente de su Ghiadoriu. In mancantzia, dae unu sotziu fundadore.

S'Assemblea no podet detzider supra argumentos chi tratant de su Ghiadoriu o de su Cunsizu.

In s'assemblea si botat semper a craru.

S'Assemblea una borta a s'annu podet elezer in su Cunsizu una pessone chi b'abarrat pro un'annu.

SA TANCADA

• Sas regulas presentes podent esser mudadas dae su Cunsizu ebia cun majoria de duos tertzos. Bi cherent, a su nessi, duas botatziones intro unu mese de tempus.
• Sas regulas presentes balent dae sa die de oe.
• SOS SOTZIOS FUNDATIVOS sunt:
• Antoni, Peppe, Micheli, Gabriella, Efis, Sperandio, Guglielmo, Fabio, Pina, Innassiu, Banne, Roberto.

Data de Imprenta: 2000-11-28

 Torra Agoa  Sighit  

Dicius Antigus