LimbaSarda 4 Noas 2003-01-09 - Notizie Associazione Nuovo Direttivo

Sotziu limbasarda - Diretivu Nou

Eris sero s'est riunidu in bia Carducci 36, in sa sea de su grupu de ballu Tzitade de Cuartu, in Cuartu Sant'Aleni, su consizu de su sotziu "Limbasarda". Su presidente Antoni Carai at relatadu a supra de s'atividade de custos urtimos duos annos e at otentu s'aprou a sas propostas de mezoru de su programa. Sun bessidos a campu ses progetos de mandare a in antis in contu a sos linguistas condotos, artigianadu, internet, unificatzione, animatzione culturale e segreteria interna. Pro donzi progetu su consizu at numenadu unu responsabile.

A pustis su consizu at numenadu su diretivu nou. Est bessida sa cunfirma pro Antoni Carai, presidente, e Peppe Corongiu, segundu. Segretariu e Cascieri novos sun Zosepe Molinu e Robertu Tola. Su consizu at esser riunidu torra in zennarzu.

Data de Imprenta: 2002-12-18

Documentu pro torrare a faedhare de Unificatzione

Foto FonteSarda - Nuraghe di Barumini 2006 n. 30 parte superiore

LIMBASARDA - SOTZIU PRO S'IDENTIDADE

S'EST RIUNIDU E AT DISCUTIDU PONENDE CUSTOS PUNTOS:

• Una limba normativizada pro totus bi servit pro chistiones de unidade e pro si poder cumprender menzus in sos iscritos.
• Lassare totu a sa "naturalesa" no faghet, e nemancu a tenner duas o prus bariedades de sardu illustre.
• Bi cheret elasticidade e volontade de torrare a sos campidanesos su chi calencunu, fortzis no cherfende, che li at furadu: s'orgolliu de fagher parte de sos Sardos.
• Sa proposta de LSU chi est bessida a campu no est sa menzus, no deghet a sa Sardigna de oe. Ma est s'unica chi como tenimus. Est dèbile e diat bastare pagu pro che la isconzare e derruere. Ma semus seguros chi, politicamente, custu siat pretzisu?
• Sa LSU at incunzadu tantu acordu cantu disacordu. Est como sempre a cando unu documentu semi-ufitziale chi diat podet esser deburradu o truvadu a in antis. Meda dipendent dae sa bolontade politica de sa Regione.
• S'arriscu mannu est chi si che torramus a mogher dae zero no si lòmpat mai prus a un'unificatzione. Sos innimigos de sa limba dian isfrutare sa situazione pro narrer chi su sardu no esistit, ma ca esistint dialetos ebia.
• Duncas est netzessariu torrare a partire pro fagher s'unificatzione dae cussa proposta chi b'est pro la "emendare" in d'unu tempus bastante e cun acontzos pretzisos.
• Su Sotziu Limbasarda est disponibile pro ordiminzare atovios intro zente esperta pro iscrier unu documentu chi potat serbire a issolver sa chistione. Deppimos, a sa sarda, ponnere omines, deppimos torrare a nos faeddare tottu impare, mancari in Cuartu, unu de sos logos dae ue sa chistione est partida.
• Su chi contat est su bene de su populu sardu e de sa limba sua e duncas cumbenit de lassare a banda odios pessonales e orgollios professionales pro chircare unu caminu pro nde bessire a fora de custu acorru ca semus faghende rier totu sos "contrarios" a sa limba.

Pro su diretivu de Limbasarda

Antoni Carai

limbasarda@infinito.it

N.B.

• 1. chie cheret su documentu cumpletu bastat chi m'iscriat una email e bi lu mando derettu;
• 2. su logu prezisu de s'attoviu bo l'amos a fagher lischire luego.

Data: 2003-01-09

Dicius Antigus